Ipuu ipa te lai in, aki mu tuo na uh ii atawp na-ah, lung zuon na le atuomtuom te na-om hi. Tu hun Pasien min tawh iki mu tuo nate uah, lungzuon na le atuomtuom te omsah lo aa, lungdam na, lungkim na, cite i-op sah ding uh kisam hi.
A ki thutuoh lo Pastor te zie le tong thu:
Tu lai, Pasien mintawh, kimu tuo nate enleih, Laisiengtho tawh kisep za dong in, Ipuu ipa te lai siang in siezaw mawk hi. Adeuhdeuh in, ei Pastor teng mama inh, kilem masa lo, kipum khat masa lo photphot ihi ziek un, thuzui mi, mipi te’n, ei tung ah ei muon na uh kiem mama hi.
Tuu te akhenthang Pastor te thu:
Ei Pastor kici teng inh, Pasien min, pawlpi min, le imipi ahi thuzui mi, ituu te zua in, “myiuh piah san tawng ” aci dan in, zang tamawk le, akisam hetlo, pawlpi tameng nono te, phut aa iki takla ziekun, imi pi te zong tuu bangin kikhen thang in, kipum khat nading asusie te pen, Pastor te ihi masa uhi.
Lungdam koh naa:
Lungdam iko thei ding uh kisam hi. Tuucing te’n, alungdam na uh, imm cip lo hi. Pasien tung beh hilo in, leitung taksa mama-ah zong, lungdam ko thei teihi dinguh kisam hi. Ei tepen, lungdam ko nading mun ah, ei ma le ei ma akihau hau lai, Pasien thupha tawh abuoibuoi, mite ei hu na van/nate tawh, abuoibuoi laite ihi ua, ada huoi mama ih ihi.
Kipawl na thu:
Kipawl na ineih ding uh akisam ahihi. Sawltak te’n zong, kipawl na ma naneih uhi. Iki lam dan na uh pen, Sawltak te kipawl ton napen, thuzui mite kipum khat na, Pasien min than na, hlamangthang mat na, mizawng, migenthei te huna cidan nahi in, ei pawlpawl ii kipawl nate pen, ei ma min daw nading, eima meet/ hamphat nading citawh, akisam lo kipawl na takeh nono te iphut liu lieu ua, iki pawl nate uah, Pasien omlo, ahi ziek in, ilaw cing thei sih uhi. “ Pasien inh, inn alam sih leh, inn lamte inn lam na in, amawk na hi aa, Pasien inh, kulh acinh sih leh, kulh cingte kulh cinh na inh, agim huoi bep ahihi” aci thu, ipawk siem dinguh kisam aa, Pasien inh, ikilam sah ding uh, Pasien inh, ikicinh sah ding uh kisam hi.
Thu pha zek/hawm ding:
Pasien inh, eite pen, a selfish ding, eima tang aa kikhuol ding aa, ei siem hilo hi. A thupha te zek sawn ding aa, ei deih ahihi. Tua ziekin, inga uh thupha te, mizawng migen thei te tung ah, izek siem kia thei ding uh, kisam hi. Ei aa pen, eima ding beh in kituot ahi ziekin, Pasien in, eite tungah, thupha tampi ei pethei lo hi. Thu pha tampi inga nop takpi uleh, thupha tampi izek sawn, ihawm sawn ding uh kisam hi. Inga uh thupha te, eima beh aa ituot ciengun, tua thupha inh, ei lunggim sah thei aa, tua inh, Pasien tung panhaa kinga thupha kicingam nawn lo ding hi. Bang ziek? “Athu pha te, lunggim na/buoi na tawh apeton lo Pasien ahihi”
Pastor kahi aci Pa/Nu thunget pieh nading tungtaang aa, sawl masah na “ tan ” 8
1. Kei, thu nei nget pieh masang in, nalei bateng vasang masa tan.
2. Kei, thu nei nget pieh masang in, na leitung Pasien, na Nu le na
Pa, valungdam sah masa tan.
3. Kei, thu nei nget pieh masang in, na Pawlpi sum nanek tum teng pi,
vasang masa tan.
4. Kei, thu nei nget pieh masang in, na pawlpi thekek teng pi, va
kilem, vagawm kia phot tan.
5. Kei, thu nei nget pieh masang in, na sum gukgol nek teng pi, vasang masa tan.
6. Kei, thu nei nget pieh masang in, na zii vathunun masa tan.
7. Kei, thu nei nget pieh masang in, na uu, nanau tawh va kilem masa tan.
8. Kei, thu nei nget pieh masang in, imi te, atung lam zum aa, na
khiek nate va dawh masa tan,
cia, ituu te’n, ei le sawl masah Pastor te ihi lo ding uh, kisam mama hi.
| < Prev | Next > |
|---|
