Article ki at nate sungah, numei lam dingtawh kisai a-at kitawm danin katuot aa, tuo ziekin Zo Christian numei te dinmun heisungah itung vuoi? Ci itun na uh / idinmun uh/ isanzie uleh, ikalsuon zie un, banglam manaw aa bangcieng tungin bangcieng tung thei lai ding cithu ingaisut ton dingun tutung in kangteel hi.Thumasa in Zo minam tepen atamzaw Christian kahihi akici ding vive dingin ka um aa, tuo ziekin Christian hinkhuo lam laisiengtho gen thu le Zo ngaina bangtan cieng nakizop in, tuni’n Zo numei te tuotung ah bang cikalsuon cithu thunibi kawm in lungngai ciet vai.
Zii le Pasal sui dan: Atom in Pasien tel Isreal mite in zii dingin neita nala ngekngek uhi. Zo tezong Pasien thu ithei masang un Laisiengtho tawh kituoh in neita cia ana kizong te ihi ua, Pasien thu ithei zaw, ipiengtha zaw ciengun tamthu amansuo danin I om ta uhi. Pawlkhat te neita lemah in, uta giagua zong kiteng in I om ta uhi.
Numei le Pasal hina: “ Pasal nakgu pan numei kisiem” Piencil 2:22. “ Pasal pen numei pan kisiem hilo aa, numei pen Pasal panaa kisiem ahihi. “ Numei dingin Pasal kisiem holo aa, Pasal dingin numei kisiem "1Cor.11: 8-9. Tam pen Pasal le Numei hina theiding amasa thuthuk pen hidingin ka um hi. Pasal nei Numei te zie ding laisiengtho genna: “ Numei lutang in Pasal hi aa, Numei in Pasal thuhilna/ukna nei-ah thumang in omta heh” Eph. 5:23-24. “ Nagam keigam, naminam kei minam “ Nomi in ci hi.
Zo numei te’n pil aci numei te: Atung aa teng pen Numei te hina zie ding Lasiengtho genna hi aa, tu’n Zo numei te ihi na uh isut kia ding uhi. Ithei sa bangun ei Zo minam tepen, mimal tawm penpen, laipil na, cimna, khuophawkna, thukhentel siem theina etc te ah azawng khaal mama te ihi uhi. Tam bang pipi matawh manawtte ihi ua, imanawt na ua, inn suong numei te in, laipilna tawm khat angnei te enleih, apasal pen sawltak agolkhat na ah akoih nuom pai talenlon, tuosieng aa anasie zaw khat taleuleu ah laipil na nei lah hilo, muna, thuthei na, cimna nei cilah hibeklo tama leh apasal pen saldan in bawlin, inn ah om hithiet in, apasal nasem ang tun kotlam ang tun phetphet in “ tuonah napuon sawp ding teng dia sa in koih ing ei” ci’n apuon die te sung ah ama numei sungten nangawn kihal ta zen hi.Apasal pen nikhat nai 24 sungah nai12 sungbang a boss te mai en nasem hi aa, inn ang tun kia ciengin a boss te siangaa khawkzaw big boss tawh kituoh kia den hileh kilawm phiel hi. Tua banah, apasal suisa sum le paai te apasal in zek sahlo banah asum zekna nangawn apasal in theisah lo in, ama sanggam unau te lambeh puo na in zang aa, anumei te sanggam lamte zong kisuong thei beklo, tawlvang golsah in lungdam mama tazen lai cidan zong ki om leh kilawm lai hi. Apasal ahing e? asi e? ci apasal sanggam ten athei zolo za dong dingin, akuikhum liklek tazen zong ki-om le kilawm hi. Pawlkhat te bangin apasal te uh vuo lai tazen aa, pasal lampa’n ngaisun leih thuohla huoison mama maileh kilawm hi. Tam bangaa, apasal akhut sungaa koizo, eknei suongpha aa aneih zo, asip hum zo, a-uk zo Zo numei tepen Zo numei adang pawlkhat in am tamama aa, numei pil in tuot tazen taleuleu hi. Pasien lamaa ang kipieng thasah masa te pawlkhat kia taleuleu enkia leih zong Pasal te ang kithuse pien zeizui takon lo cidan in, pawlkhat te gospel pei ci’n pasal dang potawh piengtha takon cizong ki-om khathei ding hileh kilawm hi. Tambang ihi laisie uh mailam khanto nading tam khollo aa, abeisa sung ikhanto zolo na uzong tamte ma te in ei maikhak zong hihtei khamai ding hi.
Numei uk Pasal te thei ding: Numei in napkuo khau avaw Pasal te in athei huoi thu pawlkhat ahi leh, na zii in ang uk, na zii ii napkuokhau vaw Pasal ihi leh, Minam makai in i-om zo sih dingaa, iminam gen nailo, isang gam te sungah zong zatah in i-om dehsuoi sih ding uhi. Tua bang pumpum matawh, Pastor poh, minam makai poi sep isawm leh, minam supna zong pieng zawthei khalai ding hi. Biekna lamaa makai sem ding te “ a inn sung, azii atate athuhil siemzo te hidng hi, a inn sung, azii atate athuhil zo sihleh, pawlpi bang aci makaih zo dieai? ”ci’n 1Tim.3:4-5 sungah sawltah Paul in rule nakoih ngiet hi. Ei aa valien pipen, pulpit tungaa I awngawng tagietguot sam ua, inn atun ciengun aapa guollel bangaa meikhup tavalon, cite dan pitawh pipi matawh minam, pawlpi makai ding po aa kitahla ihi ihi khak uleh, minam le Christian hina kisung pel semsem in, minam kikhenna pieng semsem zaw ding hi. Abeisa le tuni mama aa ikalsuon zie te uh le idinmun te uh en siem ngiangua uleih, thalawp nading tam cia gending omkhol sihleh kilawm hi. Zii le tate thuhil zolo, thuhil ngam lo pi, minam le pawlpi khatpo mai ah thuhil ding aa ikipat khak ciengin, ithuhil ii aga pen Pasien in thupha eipielo ahi ziekin kikhenthang na, uimit kelmit dawt thuhilna suoh thei to lai aa, tu lien in aga imu upen tamdan hileh kilawm hi.
Numei te thei huoi thu: Numei pil, ciim kici te in, laisiengtho dungzui in apasal te bangma theina nei tasih phiel na’n leh zatahbawl in, apasal thu ngaipieh in, tuo in numeipil akici nading dinmun ah tutto aa, apasal akizatat peih mabangin ama mama zong kizatat zawlai hileh kilawm hi. Na pasal pawlpi sung, minam sungaa makai dingle vaihawm ding aa nadeih tahpi le laisiengtho gen zui in zatah masa in. Nang azii ii zatat lo napasal pen midang te’n azahtat piehlo ding cipen thei siem mama ding kisam hi. Ang kigenpieh nuomlo ciengbeh hiding aa, anuopan in “ phia “ ang kici pieh gige ding ahilam phawh bon. Na pasal napkuokhau navaw leh, pawlpi, minam po makai dingin sawl sin, napasal akitala nuom lehzong anapkuo khaupan kai inlen semsah da kon in, hamphat nale zata na nanga dehsuoi sih khamai ding hi.
Zo numei te ma le ma kimuon na nei ding: Zo numei guoh hilo in kawlgam numei atamzaw pen ma le ma kimuonna lungsim tawm hileh kilawm hi.
Numei zong Pasien in, khentel theina ding, septhei nading, genkhiet thei nading, khensat thei nading lungsim le pumpi apieh hi aa, Pasal te tung beh aa kingam ding aa Pasien in eisiem hilo hi. Cicieng in Pasal te dem iiliel ding cina hilo hi. Numei in ama dingmun ah thuneina nei aa, Pasal inzong ama dingmun ah thuneina anei ihi uhi.
Ithunei na uh le apanmun uh kibang lo thei kha ding cicieng beh hizaw hi. Ei aa pen numei khat in pasal anei leh, “ka pasal eiva ding hi” nei va zolo ding bang ding aa zii aa neineih ee? Kici izathei zel uhi. Tamin, inn sung khanto nading beh thamlo minam le gam khanto nading tha kiem sah gige hileh kilawm hi. Zii te’n tuobang aci kawm pumpum matawh apasal te eknei suongpha in koih nuom lai tazen ihi ziekun adahuoi zawkan lai dinmun ah Zo numei te aki om lai hileh kilawm hi.
Numei pil kici te: Numei pil kici dihtah te in ahileh, “ naminam keiminam” Nomi in aci danle “ sum kuong in alii khuot” ci Zo paunak a-omle laisiengtho gen zui in, apasal zatah in, amaa khuotin, amaa lamah kikhuol in a-om te ahihi.
Thukhupna: Pasien lam beh hilo, gamle nam mama akhanto thei nading in, Numei le Pasal inn suonna zong, tawtang khatin a-om gige nahi aa, kahnto nading akhak le anawngkai sah ahi, Zo Christian numei te in, ma le ma kimuon lo na, ma le ma kengtawh din sawm lona, pasal te eknei suongpha aa neile, napkuokhau vaw in, pasal te sanggam lam ten ipasal uh asii e? ahing e? ci athei zolo zadong aa ibawl uleh ipasal te uh sawltah agol 1 ameng 1 le sila danaa ibawl, khak ua, pasal zo kisa in inumeipi te mai aa iki hisah liepluop in, tuobang pasal zote numeipil aa ituot khak lai sangsie uh thumaan lo, zie ahilo, laisiengtho tawh kituohlo, Zo ngaina tawh zong kituoh lo, khanto na zong ahilo hi aa, iki puophat ua, numei te in pilsawm in, Pasien gam, nam khanto nading ua, pan ilak sawm ding un ahun hita hi cithu iphawk kia dingun iki hawmsawn uhi.
Zo christian pasal te dinmun le zie le tong mai lamah zom kia vai.
| < Prev | Next > |
|---|
